ကျေးဇူးတင်လွှာ


ဒီစာမျက်နှာလေးဖြစ်မြောက်ဖို့ တစ်ဖက်တစ်လမ်းက ကူညီပေးကြတဲ့
ဘလော့ဂ်စာမျက်နှာပေါ်က စီနီယာတွေအားလုံး ဂျူနီယာတွေအားလုံး
ဘလော့ဂ်ချစ်သူတွေအားလုံးကို ကျေးဇူးအထူးတင်ကြောင်း ပြောပါရစေ။
အောင်မြေ စာမျက်နှာမှာ ခဏတာရောက်ခဲ့ကြတဲ့ မိတ်ဆွေများအတွက် တစ်ခုလေးလောက် အမှတ်တရဖြစ်သွားခဲ့ရင် ပီတိဖြစ်ရပါတယ်။
ဒီအတွက် ပင်ပန်းရ၊ ကြိုးစားရ တာတွေက ပျော်ရွှင်မှုကို ဖြစ်စေပါတယ်။ ဆုရည် ကြိုးစားနေပါတယ်လို့ ….

Welcome to Aung Myay Blog Welcome to Aung Myay Blog Welcome to Aung Myay Blog Welcome to Aung Myay Blog

Friday, June 20, 2008

လူချမ်းသာ စိတ်ချမ်းသာ (၉)

လူချမ်းသာ စိတ်ချမ်းသာ

လူဖြစ်လာလျှင် လူလည်း ချမ်းသာဖို့လိုသည်။ စိတ်လည်း ချမ်းသာဖို့လိုသည်။ လူချမ်းသာ၊ စိတ်ချမ်းသာ ဖြစ်မှ လူဖြစ်ရကျိုးနပ်မည်။ သို့ဖြစ်၍ လူချမ်းသာ၊ စိတ်ချမ်းသာအောင် ကြိုစားအားထုတ်ဖို့ လိုအပ်သည်။ တချို့က လူတော့ချမ်းသာပါ၏။ စိတ်မချမ်းသာကြ။ တချို့က စိတ်တော့ချမ်းသာပါ၏၊ လူမချမ်းသာကြ တချို့က လူရော စိတ်ပါချမ်းသာကြသည်။ တချို့က လူရောစိတ်ပါ မချမ်းသာကြချေ။



တချို့က ငေကြေးဥစ္စာပေါများပါသည်။ သို့သော် အသိတရားမရှိကြ။ ဘာသာရေး အဆုံးအမ ကင်းလွတ် နေကြသည်။ ဘုရားမရှိ၊ တရားမရှိ၊ စည်းလွတ် ကမ်းလွတ်နေကြ၏။ တချို့က ဘာသာရေး လုပ်သည်ဆိုသော်လည်း လူမြင်ကောင်းရုံသာလုပ်သည်။ တကယ်ရိုးရိုးသားသား စစ်စစ်မှန်မှန် မဟုတ်ကြ။ မိမိတို့ လိုလားချက် တစ်ခုခု အတွက်ကြောင့်သာ ဘာသာရေးကို ခုတုံးအနေဖြင့် လုပ်ကြသည်။ ထိုသူမျိုးသည် ငွေကြေး ဥစ္စာရှိ၍ လူတော့ချမ်းသာနိုင်ပါ၏။ စိတ်ချမ်းသာမှုကိုတော့ ရရှိမည် မဟုတ်ပေ။



တချို့က မရှိအေးအေး ရှိအေးအေး သမားများဖြစ်ကြသည်။ လိုချင်တပ်မက်မှုလည်းမရှိ။ လောဘ၊ ဒေါသလည်း သိပ်မရှိ။ ကြီးပွားချင်စိတ်၊ ချမ်းသာချင်စိတ်လည်းမရှိ။ ကြီးပွားအောင် ချမ်းသာအောင် လည်းမလုပ်။ ကိုယ်ပင်ပန်း စိတ်ပင်ပန်းလည်းမခံ။ အစားကိုလည်း ရောင့်ရဲနိုင်၏။ အဝတ်ကိုလည်း ရောင့်ရဲနိုင်၏။ နေစရာအိမ်ကိုလည်း ဖြစ်သလိုနေသည်။ ဘယ်အရာကိုမျှ ပူပန်လှသည်မရှိ။ ဘုရားရှိခိုး၊ ပုတီးလေးစိပ် ပုံမှန်လုပ်သည်။ ဘယ်သူတွေ ဘယ်မျှ ကြီးပွားနေကြ၍ သိန်းသုံးလေးရာတန် ကားစီးနေကြပေမယ့် သူ့အတွက် ဘတ်စ်ကားသည်သာ စီးတော်ယာဉ် ဖြစ်သည်။ ထိုလူမျိုးသည် ရုပ်ဝတ္ထုမချမ်းသာ၊ လူမချမ်းသာ ပေမယ့် စိတ်ချမ်းသာသော ပုဂ္ဂိုလ်မျိုး ဖြစ်သည်။



တချို့က ကြီးပွားချင်စိတ်၊ ချမ်းသာချင်စိတ်ရှိကြ၏။ ကြီးပွားခြင်း၊ ချမ်းသာခြင်း၏ အရေးပါပုံ၊ အရာရောက်ပုံ၊ တန်ဖိုးရှိပုံတို့ကိုလည်း သဘောပေါက်ကြသည်။ ကြီးပွားချမ်းသာခြင်း၏ အကြောင်းနည်းလမ်းကိုလည်း လေ့လာ လိုက်စားကြသည်။ ဆည်းပူးသင်ယူကြသည်။ လက်တွေ့လည်း ကြိုးစား အကောင်အထည်ဖော်ကြသည်။ ကြီးပွား ချမ်းသာအောင်လုပ်ကြသည်။ ကြီးပွားချမ်းသာအောင် လုပ်သော်လည်း မတော်လောဘမရှိကြ။ ရှိသင့်သော လောဘသာရှိကြသည်။ စီးပွားရှာရာ၌ လောဘမရှိ၍မဖြစ်။ လောဘနှင့်ရှာမှသာ ကြီးပွားနိုင်သည်။ လောဘသည်လည်း ကြီးပွားခြင်း၏ အကြောင်းတစ်ချက်ဖြစ်သည်။ သူတစ်ပါးကို မထိခိုက် မနစ်နာစေဖို့သာ အဓိကဖြစ်ပါသည်။



ကံ၊ ဥာဏ်၊ ၀ီရိယတို့ ကောင်းမွန်ပြည့်စုံ၍ ကြီးပွားချမ်းသာသွားသော ထိုပုဂ္ဂိုလ်သည် ဘာသာရေးကိုလည်း လိုက်စားသည်။ ဘုရားတရားကိုလည်း ကိုင်းရှိုင်းသည်။ အတု အယောင် လူမြင်ကောင်းအောင် မဟုတ်။ စစ်စစ် မှန်မှန် လုပ်ဆောင်မှုမျိုးဖြစ်သည်။ ဆွေမျိုးကိုလည်း ထောက်ပံ့သည်။ ဘာသာ သာသနာကိုလည်း ကောင်းကျိုးပြု သည်။ လူမျိုးရေးကို မြှင့်တင်သည်။ မရှိဆင်းရဲသားကို စွန့်ကြဲ၏။ မိမိဆွေမျိုးထဲမှ ချို့တဲ့သူများကို ထောက်ပံ့သည်။ ပညာရေးထူးချွန်သူများကို ချီးမြှင့်မြှောက်စားသည်။ ပရိယတ္တိတာဝန်၊ ပဋိပတ္တိတာဝန်များကို အမှန်တကယ် ထမ်းဆောင်နေသော ရဟန်းတော်တို့အတွက် ဆွမ်းလိုလျှင်ဆွမ်း၊ သင်္ကန်းလိုလျှင် သင်္ကန်း၊ ကျောင်းလိုလျှင်ကျောင်း၊ ဆေးလိုလျှင် ဆေး၊ ပစ္စည်းလေးပါးတို့ကို လိုအပ်ရာရာ လှူဒါန်းပူဇော်သည်။ အမှန် တကယ်လိုအပ်သည့် လက်တွေ့အမှန်တကယ် ကောင်းကျိုးရှိမည့် အရာများကို လိုအပ်သလို လှူဒါန်း၏။ ဆေးရုံ၊ ဆေးခန်း၊ ဆေးပစ္စည်း၊ စာသင်ကျောင်း၊ ပညာရေးအထောက်အကူ ပြုပစ္စည်းများကို လိုအပ်သည့်နေရာ၌ လိုအပ်သလို လှူဒါန်း၏။ အလှူဒါနဟူသည် လှူသူရော အလှူခံသူပါ စိတ်ချမ်းသာ စေသည်မှာ အမှန်ပင်ဖြစ်ပါသည်။



ဘာသာတရား၏ အခြေခံအုတ်မြစ်သည် မေတ္တာနှင့် ကရုဏာဖြစ်၍ ဘာသာတရား၏ ကိုယ်ထည် အဆောက်အအုံကား စောင့်စည်းမှု၊ ထိန်းသိမ်းမှု၊ မှန်ကန်မှု၊ တည့်မှတ်မှု ဝိရတီသစ္စာဖြစ်သည်။ ဘာသာတရား၏ အထွတ်အထိပ်ကား အရှိကို အရှိအတိုင်း အဟုတ်ကို အဟုတ်အတိုင်း အမှတ်ကို အမှန်အတိုင်း သဘောပေါက်မှု၊ နားလည်မှု၊ သိမြင်မှု ပညာဖြစ်သည်။



ရုပ်ပိုင်းဆိုင်ရာ ကြီးပွားချမ်းသာ၍ အမျိုးဘာသာ သာသနာကို စစ်စစ်မှန်မှန် ကောင်းကျိုးပြုကာ ဘာသာတရား၏ အခြေခံအုတ်မြစ်၊ အထည်ကိုယ်၊ အဆောက်အအုံပိုင်း၊ အထွတ်အထိပ်ပိုင်း တို့ကို သိမြင်သဘောပေါက် နေသော ပုဂ္ဂိုလ်မျိုးသည် လူလည်းချမ်းသာ စိတ်လည်းချမ်းသာ သော ပုဂ္ဂိုလ်မျိုးဖြစ်သည်။



တချို့က ကံအကျိုးပေးနုံချာလှသည်။ ဆင်းရဲတွင်းကနက်၏။ အတတ်ပညာကလည်းမရှိ။ အသိပညာကလည်း မရှိ၊ ကံကမွဲ၊ ဥာဏ်ကတုံး၊ စိုက်ထုတ်သမျှ ဝီရိယသည် ကံနှင့်ဥာဏ်မပါသဖြင့် ပင်ပန်းသလောက် ခံစားခွင့်က မရှိ။ အူမကမတောင့်သဖြင့် သီလက မစောင့်နိုင်။ အလှူဟူသည် လှူစရာရှိမှ လှူ၍ရသည်။ လှူစရာက မရှိသဖြင့် ဒါနဟူသည် ဖြူသလား၊ မဲသလားမသိ။ စားဝတ်နေရေး ရုန်းကန်နေရသဖြင့် ဘုရားကိုလည်း အမှတ်မရနိုင်၊ တရားကိုလည်း အမှတ်မရနိုင်။ သံဃာဟူ၍ အိမ်ရှေ့က ဖြတ်ကြွသော ဆွမ်းခံကိုယ်တော်ကိုပင် ဆွမ်းမလောင်း နိုင်သောကြောင့် မျက်နှာပူသဖြင့် ရှောင်တိမ်းနေရ၏။ အစားကဆင်းရဲ၊ အ၀တ်ကဆင်းရဲ၊ နေရေးထိုင်ရေးက ဆင်းရဲ၊ အရာရာဆင်းရဲ သဖြင့် လူလည်းဆင်းရဲ၏။ စိုးရိမ်မှု၊ တောင့်တမှု၊ ကြောင့်ကြမှု တို့နှင့်သာ နပန်းလုံးနေရ သဖြင့်လည်း စိတ်လည်း ဆင်းရဲ၏။ လူရော စိတ်ပါ ဆင်းရဲသော လူစားမျိုးဖြစ်သည်။



(ဓမ္မပိယဆရာတော်၊ အရှင်သံဝရာလင်္ကာရ)

ဆက်လက်တင်ပြပါမည်။

0 comments:

Posts

Followers

Labels

Comments